ചിറക്കടവ് ചരിത്രം: തമ്സ്കരിക്കപ്പെട്ടവർ, എന്നാൽ ഓർമ്മിക്കപ്പെടേണ്ടവർ

പ്രാദേശിക ചരിത്രത്തിൽ , ജനിച്ച ദേശം ,വളർന്ന ദേശം ,ജോലി നോക്കിയ ദേശങ്ങൾ ,അവസാനം വിശ്രമ ജീവിതം നയിക്കുന്ന ദേശം എന്നിവയുടെ ചരിത്രങ്ങളിൽ അതീവ താൽപ്പര്യം ഉള്ള ഒരു എൺപതുകാരനായ വയോധികൻഎന്ന നിലയിൽ, ചില ചരിത്ര സത്യങ്ങൾ തുറന്ന് എഴുതാതെ വയ്യ .

Autor Dr.Kanam Sankara Pillai

28 വര്ഷം മുൻപ്, 1977 ൽ ചിറക്കടവ് പഞ്ചായത്തിലെ ശ്രീമാന്മാർ , കവി ആണ്ടുമഠത്തിൽ പി .മധു , ബി സുനിൽ ,കെ.എം ശിവകുമാർ , കളരിപ്ലാക്കൽ കെ.എം ഗോപാലകൃഷ്ണൻ , ഓ.എം .അബ്ദുൽ ഖാദർ , കെ.സി. മധുസൂദനൻ പിള്ള തുടങ്ങിയർ തയാറാക്കിയ “ചിറക്കടവ് ഗ്രാമ പഞ്ചായത്ത് ജനകീയാസൂത്രണ വികസന രേഖ” , കോട്ടയം അവന്തി പബ്ലിക്കേഷൻസ് പ്രസിദ്ധീകരിച്ച , എന്നാൽ വിതരണം കോടതി വിധിയാൽ തടയപ്പെട്ട, ഗൾഫ് അപ്പച്ചൻ രചിച്ച , ”പൊൻകുന്നം ചരിത്രത്തിലൂടെ” (808 പേജുകൾ ) എന്ന ദേശചരിത്രം , കാഞ്ഞിരപ്പള്ളി കല്ല റയ്ക്കൽ കുരുവിള കുഞ്ഞുവർക്കി (1947), ഫാദർ ജേക്കബ് എർത്തയിൽ (1985) തുടങ്ങി അര ഡസൻ പേർ എഴുതിയ ചിറക്കടവ്-കാഞ്ഞിരപ്പള്ളി ദേശചരിത്രങ്ങൾ എൻ്റെ ശേഖരത്തിൽ ഉണ്ട് .

1977 ലെ ചിറക്കടവ് ഗ്രാമ പഞ്ചായത്ത് ജനകീയാസൂത്രണ വികസനരേഖയിൽ ആദരണീയനായ ശ്രീ മധുവിന്റെ നേതൃത്വത്തിലുള്ള സംഘം ഇങ്ങനെ എഴുതി വച്ചു (പുറം 103 ) :

”നമ്മുടെ പ്രദേശത്തു നവോത്ഥാന പ്രവർത്തങ്ങൾക്ക് നേതൃത്വം കൊടുത്ത ചിലപ്രമുഖ വ്യക്തികൾ ,സ്ഥാപനങ്ങൾ എന്നിവയെ കുറിച്ചുള്ള കുറിപ്പുകൾ തുടർന്ന് ചേർക്കുന്നു. ജീവിച്ചിരിക്കുന്നവരെ കുറിച്ച് പരാമർശിക്കുന്നില്ല . ഇത് പൂർണ്ണമാക്കി നമ്മുടെ പ്രദേശത്തിന്റെ സംസ്കാരത്തെ കുറിച്ച് സമഗ്ര പഠനം തയാറാക്കി സൂക്ഷിക്കുക എന്നത് അടിയന്തര പ്രാധാനം അർഹിക്കുന്നു . വ്യക്തികൾ ചില വ്യക്തികളെ കുറിച്ച് കുറിപ്പുകൾ ചേർക്കുന്നതിന് പ്രത്യേക ഉദ്ദേശമുണ്ട്. പലവിധ സാംസ്കാരിക പ്രവർത്തനങ്ങളിൽ സുപ്രധാനമായ പങ്കു വഹിച്ചിരുന്ന ഇത്തരം ആളുകൾ നമ്മുടെ ഓർമ്മയിൽ നിന്നും മാഞ്ഞു തുടങ്ങിയിരിക്കുന്നു .ഇവരെ കുറിച്ചെല്ലാം പൂർണ്ണ വിവരങ്ങൾ ശേഖരിച്ചു സൂക്ഷിക്കയും പഞ്ചായത്ത് കേന്ദ്രത്തിൽ ഒരു ഡോക്കുമെന്റേഷൻ സെന്ററും മ്യൂസിയവും സ്ഥാപിക്കയും ചെയ്യുക എന്ന നിർദ്ദേശം ഗ്രാമ സഭകളിൽ നിന്നുയർന്നു വന്നിട്ടുണ്ട് ……..” സ്വാമി ദയാനന്ദൻ (വൈക്കം സി.കെ .നാരായണ പിള്ള), ആയുവേദാചാര്യൻ പണ്ഡിറ്റ് സി .രാമകൃഷ്ണൻ നായർ തുടങ്ങി പി .ആനന്ദൻ വരെയുള്ള 21 നവോത്ഥാന നായകരുടെ ലിസ്റ്റ് ശ്രീ മധുവിന്റെ സംഘം നൽകിയിരുന്നു .

1977 ൽ ജീവിച്ചിരുന്ന, അറിയപ്പെട്ടിരുന്ന , ചില വ്യക്തികൾ കഴിഞ്ഞ 28 വർഷങ്ങൾക്കിടയിൽ കഥാവശേഷർ ആയി . അന്നത്തെ 21 പേരുടെ ലിസ്റ്റിൽ തന്നെ സ്ഥാനം പിടിക്കാതെ പോയ,ഏതാനും അറിയപ്പെടേണ്ട വ്യക്തികളും ഉണ്ടായിരുന്നു . അവരെയൊന്നും ദൃശ്യം 2 K 25 സംഘം കണ്ടെത്തിയില്ല എന്നത് പരിതാപകരം തന്നെ. സാരമില്ല ഇനിയും പരിഹരിക്കാവുന്നതേ ഉള്ളു .

ആ ലിസ്റ്റിൽ പെടേണ്ട ചിലരെ നമുക്കൊന്ന് പരിചയപ്പെടാൻ ശ്രമിക്കാം . അപ്പോഴും ചിലരെ വിട്ടുപോയെന്നും വരാം എന്നൊരു മുൻ കൂർ ജാമ്യം കൂടി എടുക്കട്ടെ .

തെറ്റുകളും തമ്സ്കരണ ങ്ങളും ചൂണ്ടിക്കാട്ടാതിരുന്നാൽ ഭാവിയിൽ ഹൈസ്‌കൂൾ ,കോളേജ് വിദ്യാർത്ഥികൾ ഈ പിതൃ രഹിത , വിരുപ സചിത്ര ലേഖനത്തെ ആധാരമാക്കി ഭാവിയിൽ ഡെസ്സേർട്ടേഷനുകളും ഗവേഷണ വിദ്യാർത്ഥികൾ പി.എച്ച് ഡി തീസിസുകളും എഴുതി തെറ്റായ ചിറക്കടവ് ദേശചരിത്രം എഴുതും .

എടത്വവായിൽ ജനിച്ചു പാമ്പാടിയിൽ ജീവിച്ചിരുന്ന , എഴുതിത്തുടങ്ങും കാലം മാത്രം പൊൻകുന്നത്ത് താമസിച്ചിരുന്ന, പൊൻകുന്നം വർക്കി ,തിരുവല്ലാക്കാരൻ ഏ .കെ പാച്ചുപിള്ള വക്കീൽ എന്ന എതിരില്ലാതെ തെരഞ്ഞെടുക്കപ്പെട്ട അക്കാലത്തെ തിരുകൊച്ചി പീരുമേട് എം എൽ ഏ (പി.എസ് പി ), അദ്ദേഹത്തിൻ്റെ പേരിലുള്ള ലൈബ്രറി റോഡ് ,അക്കാമ്മ ചെറിയാൻ , പഴയ റെജിസ്റ്റർ കച്ചേരി ,മംഗലത്തു ചാക്കോ , താന്നുവേലിൽ രാമൻപിള്ള (പാച്ചുപിള്ള ), പൊൻകുന്നം സെയ്തു മുഹമ്മദ് (സീനിയർ ) പൊൻകുന്നം ദാമോദരൻ ,വി.ജെ ജോസഫ് , കെ എം .സദാശിവൻ നായർ (ആവർത്തനം ) ,മുണ്ടിയാനിക്കൽ ഗോപാലൻ നായർ , പി .ടി ചാക്കോ ,കാന്തി ഹർഷ കെ എച്ച് ഖാൻ ,മുണ്ടിയാനിക്കൽ ഗോപാലൻ നായർ , കെ ജോസഫ് ,കവിയൂർ പൊന്നമ്മ , വിദ്വാൻ എം പി കരുണാകരൻ നായർ എന്നിവരുടെ ഫോട്ടോകൾ (ഇവരിൽ പി.ടി ചാക്കോ ,കവിയൂർ പൊന്നമ്മ എന്നിവരുടെ ഫോട്ടോകൾ ഒഴിച്ചാൽ ബാക്കിയുള്ളവ കണ്ടാൽ ശരിക്കും ഭീകര പ്രേതാത്മാക്കൾ എന്ന് തോന്നും . പേരുകൾ കണ്ടെത്തിയത് ശക്തിയേറിയ ലെൻസുകളുടെ സഹായത്താൽ .) നൽകിയിരിക്കുന്നു. അടിക്കുറിപ്പുകൾ വായിക്കാൻ കഴിഞ്ഞില്ല . പേരുകൾ ശരി തന്നെയോ എന്നും സംശയം . ഭാരവാഹികളുടെ ഫോട്ടോകളെക്കാൾ മെച്ചപ്പെട്ടവ ആക്കേണ്ട ,എങ്കിലും ഇത്രയും മോശമാക്കി ചരിത്ര പുരുഷരെ അധിക്ഷേപിക്കേണ്ട കാര്യം ഉണ്ടായിരുന്നില്ല .

മറ്റൊരു പേജിൽ ആർട്ട് പേപ്പറിൽ അവരുടെ ഫോട്ടോകൾ നൽകി അവരെ ആദരിക്കേണ്ടതിനു പകരം പ്രസ്തുത മഹത് വ്യക്തി കളെ അപമാനിക്കയാണ് ചെയ്തത് എന്ന് എഴുതേണ്ടി വന്നതിൽ ഖേദിക്കുന്നതു .

ആധുനിക പൊന്കുന്നതിന്റെ ജനയിതാവ് അഥവാ ശില്പി എന്ന നിലയിൽ ആവാം തിരുവല്ലാക്കാരൻ ഏ.കെ .പാച്ചുപിള്ള , എന്ന ആദ്യകാല ,തിരുകൊച്ചി നിയമ സഭാംഗത്തിന്റെ വികലമായ ചിത്രവും അദ്ദേഹത്തിന്റെ പേരിൽ ഉള്ള റോഡിന്റെ ഫോട്ടോയും നല്കപ്പെട്ടത്. “ഏ .കെ പാച്ചുപിള്ള വക്കീൽ -പൊന്കുന്നതിന്റെ ശില്പി “ എന്ന തലക്കെട്ടിൽ അന്തരിച്ച എൻ്റെ പ്രിയ സുഹൃത്ത് ,ജോസഫ് മാത്യു കിളിരൂപറമ്പിൽ ,”ജനകീയ വായനശാല ഒന്നാം വാർഷിക സോവനീറി”ൽ എഴുതിയ ലേഖനം -പുറം 93 -94 കാണുക .

ശുദ്ധ വിവരക്കേട്. വാസ്തവത്തിൽ ദുരൂഹ സാഹചര്യത്തിൽ കൊല്ലപ്പെട്ട അദ്ദേഹമാണോ ചിറക്കടവ് വാസികളാൽ ആദ്യം സ്മരിക്കപ്പെടേണ്ട വ്യക്തി . ഒരു തിരുവല്ലക്കാരൻ ,എതിരില്ലാത്ത കാരണത്താൽ മാത്രം പീരുമേട് നിയമ സഭാഅംഗത്വം കിട്ടിയ പാച്ചുപിള്ള വക്കീൽ ആണോ പൊൻകുന്നം ടൗണിന്റെ മുഖഛായ മാറ്റിയ ശില്പി ?

ട്രാവന്കൂർ സ്റേറ് ബാങ്ക് ,ഡി ഈ ഓ ഓഫീസ് എന്നിവ, ആക്കാലം ഏറെ പിടിപാടുള്ള ആൾക്കാർ ഉണ്ടായിരുന്ന കാഞ്ഞിരപ്പള്ളി യിലേക്ക് പോകാതെ പൊങ്കുന്നത്തു തന്നെ പിടിച്ചു നിർത്തിയതിന്റെ പേരിലാവണം അന്തരിച്ച എൻ്റെ സുഹൃത് ജോസഫ് മാത്യു അദ്ദേഹത്തിന് “ശില്പി” സ്ഥാനം നൽകിയത് . പാച്ചുപിള്ള വക്കീൽ ഏതാനും നല്ല ചിത്രങ്ങൾ നന്നായി വരച്ചു പൊന്കുന്നതിന്റെ മുഖ ഛായ മാറ്റി എന്നത് വസ്തുത തന്നെ .

പക്ഷെ ചുവരില്ലാതെ ആർക്കാണ് ചിത്രം വരയ്ക്കാൻ കഴിയുക ?

പാച്ചുപിള്ളയ്ക്ക് ചിത്രങ്ങൾ വരയ്ക്കാൻ വന്മതിൽ പണിയിച്ചു നൽകിയത് തനതു പൊൻകുന്നം കാരനായ മ .രാ. രാജ ശ്രീ (മഹാരാജാവിൽ നിന്നും രാജശ്രീ പട്ടവും ഒപ്പം സ്വർണ്ണം കെട്ടിയ അംശ വടിയും ലഭിച്ച “ഭാരത കർണ്ണഗി” എന്ന് മംഗള പത്രങ്ങളിൽ വിശേഷിപ്പിക്കപ്പെട്ട നാട്ടു പ്രമാണി വാഴൂർ മുസാവരി ബംഗ്ളാവിന്റെ അധികാരിയായിരുന്ന, പുന്നാം പറമ്പിൽ അയ്യപ്പൻ പിള്ള നീലകണ്ഠപിള്ള ആയിരുന്നു എന്ന കാര്യം എല്ലാവരും തമ്സ്കരിച്ചു .ചിറക്കടവ് മഹാദേവർ ക്ഷേത്രത്തിൽ നടയ്ക്കിരുത്തപ്പെട്ട പ്രശസ്ത ഗജകേസരി “തിരുനീലകണ്ഠന്” ആ പേരുകിട്ടിയത് ഈ നീലകണ്ഠപ്പിള്ളയുടെ പേരിൽ നിന്നാണ് എന്ന വസ്തുത പോലും തമ്സ്കരിക്കപ്പെട്ടു .ക്ഷേത്രത്തിലെ വെള്ളിയാൽ തീർക്കപ്പെട്ട ഋഷഭ വാഹനവും അദ്ദേഹത്തിന്റെ സ്മരണ ഉണർത്തുന്നു . ആദ്യകാല സ്റേറ് ബാങ്ക് ,ഡി. ഈ. ഓ ഓഫിസ്, സബ്ട്രഷറി,മുൻസിഫ് കോടതി (സ്‌കൂളിനായി പണിയിച്ച കെട്ടിടം ), ഇലക്ടിസിറ്റി ഓഫിസ്, പോസ്റ്റ് ഓഫീസ്,തുടങ്ങിയ സർക്കാർ ഓഫീസികളും ആദ്യകാല സ്വകാര്യ ബാങ്കുകളായ കമലവിലാസം ,പാലാ സെൻട്രൽ ബാങ്ക് കാഞ്ഞിരപ്പള്ളി റോഡിലും പാലാറോഡിലും ഉണ്ടായിരുന്ന ഇരുപതോളം കച്ചവട സ്ഥാപങ്ങൾക്കുള്ള കട്ടിടങ്ങൾ ,വക്കീൽ ഓഫീസുകൾക്കുള്ള കെട്ടിട സമുച്ചയം എന്നിവയെല്ലാം വന്നത് നീലകണ്ഠപിള്ള പണിയിച്ച കെട്ടിടങ്ങൾ ഉണ്ടായിരുന്നതിനാലാണ് എന്ന യാഥാർഥ്യം മറച്ചു വയ്ക്കപ്പെട്ടു . ആധുനിക പൊന്കുന്നതിന് നല്ലൊരു മുഖഛായ ഉണ്ടാകാൻ കാരണം പുന്നാംപറമ്പിൽ നീലകണ്ഠപ്പിള്ളയുടെ നിർമ്മിതികളാൽ ആയിരുന്നു എന്ന പരമ സത്യം തമ്സ്കരിക്കപ്പെട്ടു . ബലമേറിയ ഭംഗിയേറിയ ചുവരുകൾ നിർമ്മിച്ചത് ചിറക്കടവ് കാരൻ നീലകണ്ഠപ്പിള്ള .ചിത്രം വരച്ചത് തിരുവല്ലാക്കാരൻ പാച്ചുപിള്ള എന്നതാണ് യഥാർത്ഥ ചരിത്രം .

ആയുർവേദാചാര്യൻ, പണ്ഡിറ്റ് രാമകൃഷ്ണൻ നായർ വൈദ്യരുടെ (1905 -1971 ) പേര് ശ്രീ മധു രണ്ടാമതായി നൽകി . ഇപ്പോൾ ഒഴിവാക്കപ്പെട്ടു . എന്നാൽ ആയുർവേദ ചികിത്സകൻ എന്ന നിലയിൽ ഇരുകൂട്ടരും തമസ്കരിച്ചത് മണ്ണംപ്ലാവ് മുതൽ കൊരട്ടി ആറുവരെയുള്ള ആറായിരം ഏക്കർ വസ്തുവിന്റെ ഉടമ ആയിരുന്ന, ചിറക്കടവിലെ ആദ്യകാല ശൈവ വെള്ളാള “വലിയ വൈദ്യൻ”, പലയകുന്നേൽ പദ്മനാഭ പിള്ളയെ (വൈദ്യകലാനിധി പി.എൻ പിള്ള യുടെ പിതാവ്) ആണ് . ഫാദർ ജേക്കബ് എർത്തയിൽ എഴുതിയ “കാഞ്ഞിരപ്പള്ളി ദേശ ചരിത്രം” പുറം 236 കാണുക .തികച്ചും ക്രൂരവും നിന്ദ്യവും ആയിപ്പോയി ആ തമസ്കരണം .അദ്ദേഹത്തിൻ്റെ പിഗാമികളിൽ പലരും ഇന്നു പരക്കെ , നാട്ടിലും വിദേശങ്ങളിലും ഒരുപോലെ ആദരിക്കപ്പെടുന്ന അംഗീകരിക്കപ്പെടുന്ന ആതുരസേവകർ. ആയുർവേദത്തിലുംഒപ്പം മോഡേൺ മെഡിസിനിലും

സോവനീറുകൾ കഴിഞ്ഞ വര്ഷം അങ്ങനെ ഈ വര്ഷം ഇങ്ങനെ (സോവനീർ വിമര്ശനം 2 )

കഴിഞ്ഞ വര്ഷം (2024) രണ്ട്‌ അതുഗ്രൻ സോവനീറുകൾ കയ്യിൽ കിട്ടി . ഒന്നിനൊന്നു മെച്ചം . ആദ്യ സോവനീർ തയാറാക്കിയത് അമേരിക്കൻ മലയാളികൾ . വാഷിംഗ്ടൺ ഡി. സിയിൽ ,തലേവർഷം നടന്ന ശ്രീനാരായണ ഗുരു പ്രതിഷ്ഠയുടെ ഒന്നാം വാർഷിക സ്മരണ വേളയിൽ, നോർത്ത് അമേരിക്കയിലെ ശിവഗിരി മഠത്തിനു വേണ്ടി, തയാറാക്കിയഅത്യുഗ്രൻ സോവനീർ . കേരളത്തിലെ പ്രകാശനം കേരളസംസ്ഥാന വിവരാവകാശ ആദ്യ കമ്മീഷണർ ആയിരുന്ന കങ്ങഴ പത്തനാട് സ്വദേശി,എൻ്റെ പ്രിയ സുഹൃത്ത് , റിട്ട ജഡ്ജ് വിജയകുമാർ . പ്രതി ഏറ്റു വാങ്ങിയത് ഞാനും .വേദി :കമലദളം പ്രതിമാസ മീറ്റ്, കോട്ടയം കളത്തിപ്പടി.

രണ്ടാമത്തെ സോവനീർ എനിക്ക് സമ്മാനിച്ചത് ഇന്ത്യയിൽ ആദ്യമായി ഭൂപരിഷ്കരണ ബിൽ അവതരിപ്പിച്ച തിരുക്കൊച്ചി ധന വന റവന്യൂ മന്ത്രി പി.എസ് നടരാജപിള്ളയുടെ കൊച്ചുമകൻ, പ്രൊഫ .മോത്തിലാൽ നെഹ്‌റു എന്ന സോവനീർ എഡിറ്റർ . തിരുവനന്തപുരം ചാലയിലെ പ്രമുഖ വെള്ളാള വ്യാപാരികളുടെ കൂട്ടായ്മ ആയ “വെള്ളാള സമതി ട്രസ്റ്റി”ന്റെ മുപ്പതാം (പേൾ ) വാർഷിക സോവനീർ .

രണ്ടും ഒന്നിനൊന്നു മെച്ചം .

അത്തരം രണ്ടു സോവനീറുകളെ എനിക്ക് മുക്ത കണ്ഠം പ്രശംസിക്കേണ്ടിവന്നത് പ്രധാനമായും അതിലെ ഉള്ളടക്കം കാരണം .

ഈ വര്ഷം ആദ്യ കിട്ടിയ സോവനീർ , പൊൻകുന്നം ഗ്രാമ പഞ്ചായത്ത് വക വിലയേറിയ “ദൃശ്യം 2 K 25 സോവനീർ”. പക്ഷേ അത്എന്നെ തീർത്തും നിരാശനാക്കി കളഞ്ഞു. ഉള്ളടക്കത്തിന്റെ കാര്യത്തിൽ . കെട്ടും മട്ടും അതിനിൽ നിന്ന് കിട്ടിയ പരസ്യക്കൂലിയും ഒന്നും നോക്കാതെ ഉള്ളടക്കം മാത്രം നോക്കുന്ന എന്നെ ആ സോവനീർ ഒട്ടും തന്നെ ആകർഷിച്ചില്ല. തികച്ചും നിരാശനാക്കി .

“കൂത്താട്ടം കണ്ട കണ്ണിൽ കുരങ്ങാട്ടം കാണുക” എന്നൊരു ചൊല്ലുണ്ട് മലയാളത്തിൽ . ആ ചൊല്ല് ഓർമ്മയിൽ ഓടിയെത്തി .

പ്രത്യേകിച്ചും വിസ്മരിക്കാൻ പാടില്ലാത്ത പ്രാദേശിക നവോത്ഥാന നായകരുടെ പ്രേത ഫോട്ടോകൾ കാണാൻ ഇടവന്നപ്പോൾ .

പൊൻകുന്നം കാർക്ക് ഒരിക്കലും മറക്കാൻ കഴിയാത്ത , മറക്കരുതാത്ത വ്യക്തിത്വമാണ് “വലിയ വക്കീൽ” എന്നറിയപ്പെട്ട ഇരുപത്തി രണ്ടു പ്രഗത്ഭ വ്യക്തികളുടെ പിതാവും ശ്രീ മൂലം സഭാമെമ്പറും ശ്രീ കമലാലയം പി.എൻ പിള്ള സ്ഥാപിച്ച കമലാ ബസാറിൽ വക്കീൽ ഓഫിസ് ഇട്ടിരുന്ന , മലയൻ റംബൂട്ടാൻ, മാംഗോസ്റ്റിന്,ഫുലാസാൻ .ദൂരിയാൻ ഫലവൃക്ഷ സ്‌നേഹി , ഡൊമനിക് തൊമ്മൻ കരിപ്പാപ്പറമ്പിൽ എന്നദുമ്മിനി വക്കീൽ. കാഞ്ഞിരപ്പള്ളിയിലെ ടി ബി റോഡ് അദ്ദേഹത്തിന്റെ പേരിൽ അറിയപ്പെടുന്നു .അദ്ദേഹത്തിന്റെ ജൂനിയർ ആയിരുന്നു പിൽക്കാലം ശ്രീ മൂലം പ്രജാസഭയിൽ ഭൂപരിഷ്കരണത്തെ കുറിച്ച് ആദ്യമായി പ്രസംഗിച്ച ,പി.എസ് നടരാജപിള്ളയുടെ വഴികാട്ടി, SR എന്ന രണ്ടക്ഷരത്താൽ അറിയപ്പെട്ട പങ്ങപ്പാട്‌ ശങ്കരപ്പിള്ള രാമനാഥ പിള്ള ( വഞ്ഞിപ്പുഴ ചീഫിന്റെ കാരുദർശിയായിരുന്ന പങ്ങപ്പാട്ട് ശങ്കരപ്പിള്ളയുടെ രണ്ടാമത്തെ മകൻ .1952 ൽ പുറത്തിറങ്ങിയ തിരമാല എന്ന ചലച്ചിത്രം നിർമ്മിക്കാൻ സ്ഥാപിച്ച “കലാസാഗർ” ഫിലിംസിന്റെ സ്ഥാപകൻ .തുടർന്ന് അദ്ദേഹം ചലച്ചിത്ര രംഗത്ത് ഗണ്യ മായ സംഭാവനകൾ നൽകിയ നാല് തലമുറകളുടെ കാരണവ സഥാനത്തെത്തി .അതിൽ മൂന്നു പേർക്ക് ഇന്ത്യൻ പ്രസിഡന്റ് വിശിഷ്ട സേവനത്തിനു മെഡൽ കിട്ടി എന്ന പ്രത്യേകത കൂടിയുണ്ട് .നീല സുബ്രഹ്മണ്യത്തിനോ ഉദയ കുഞ്ചായ്ക്കോ നേടാൻ കഴിയാതെ പോയ അപൂർവ്വ ബഹുമതികൾക്കർഹൻ നമ്മുടെ ഒരു നാട്ടുകാരൻ .

തമിഴ് നാട്ടിൽ നിന്നും കേരളത്തിലേക്ക് മലയാള ചലച്ചിത്ര വ്യവസായം പറിച്ചു നട്ട പി.ആർ .എസ് പിള്ള (1953 ൽ പുറത്തിറങ്ങിയ തിരമാലയുടെ സംവിധായകൻ ,പരസ്യ ചിത്രത്തിന് ഇന്ത്യൻ പ്രസിഡന്റിൽ നിന്നും ആദ്യ അവാർഡ് വാങ്ങി ).മകൻ ഇന്റർനാഷണൽ ഫിലിം ഫെസ്റ്റിവൽ ചെയര്മാൻ ,എം ടി യുടെ മഞ്ഞിലെ നായകൻ ശങ്കർ മോഹൻ അഭിനയത്തിന് പ്രസിഡന്റിന്റെ മെഡൽ നേടി .അദ്ദേഹത്തിന്റെ മകൻ മോഹൻ ശങ്കർ വീണ്ടും പരസ്യചിത്രത്തിനു പ്രഡന്റിൽ നിന്നും അവാർഡ് വാങ്ങി അഖിലേന്ത്യാ തലത്തിൽ ചരിത്രം സൃഷ്ടിച്ചു .

പക്ഷെ നമ്മുടെ സോവനീർ കാർ അതൊന്നും കാണാതെ കേൾക്കാതെ സുഖ സുഷുപ്തിയിൽ ആണ്ടു കിടന്നു .

ചിറക്കടവിലെ ആദ്യ സരസ്വതീക്ഷേത്രം സ്ഥാപിച്ച വൈക്കം കാരൻ സി.കെ നാരായണ പിള്ള (ദയാനന്ദ സ്വാമികൾ 1880 -1934 )

1997 ൽ ശ്രീ .പി മധുവിന്റെ നേതൃത്വത്തിൽ തയാറാക്കിയ “ ചിറക്കടവ് പഞ്ചായത്ത് വികസന രേഖയിൽ നവോത്ഥാന നായകരിൽ ഒന്നാമനായി ലിസ്റ്റ് ചെയ്യപ്പെട്ടത് , പിൽക്കാലത്ത് ദയാനന്ദ സ്വാമികൾ ആയി മാറിയ വൈക്കം സി.കെ നാരായണ പിള്ളയെ (1880-1934 ) ആണെന്ന കാര്യം എടുത്ത് പറയട്ടെ .കോട്ടയം ജില്ലയിൽ ആനിക്കാട് മുക്കാലിയിലുള്ള ഇപ്പോഴത്തെ എൻ. എസ്. എസ് സ്‌കൂൾ സ്ഥാപിച്ചത് പിൽക്കാലത്ത് “സ്വാമി നാരായണൻ” ആയി മാറിയ തൊടുപുഴ സി.കെ. നാരായണപിള്ള എങ്കിൽ “ദയാനന്ദ സ്വാമികൾ” ആയി മാറിയ വൈക്കം സി.കെ. നാരായണപിള്ളയാണ് (ശ്രദ്ധിക്കുക ഇരുവരും ഒരേ പേരു കാർ )ചിറക്കടവ് ,ചെറുവള്ളി , കൊടുങ്ങൂർ, അടൂർ , പന്തളം എന്നീ ഗ്രാമങ്ങളിൽ ആധുനിക രീതിയിലുള്ള പ്രൈമറി സ്‌കൂളുകൾ തുടങ്ങിയത് .

“ആധുനിക വാഴൂരിന്റെ പിതാവ്” വാഴൂർ തീർത്ഥപാദപുരം ആശ്രമ സ്ഥാപകൻ തീർത്ഥ പാദസ്വാമികളെ (വടക്കൻ പറവൂർകാരൻ നാരായണ കുറുപ്പ് അഥവാ നാണുക്കുട്ടൻ ) ജന മധ്യത്തിലേക്കു ഇറക്കി കൊണ്ടുവന്നു പ്രഭാഷകൻ ആക്കി മാറ്റിയതും നായർ നവോത്ഥാന നായകൻ ആക്കിമാറ്റിയതും മന്നത്തു പദ്മനാഭന്റെ വഴികാട്ടി ആക്കി മാറ്റിയതും വാഴൂർ നിവേദിത ശ്രീമതി കെ.ചിന്നമ്മയെ വനിതാ നായർ നവോത്ഥാന നായിക ആക്കി മാറ്റിയതും എല്ലാം വൈക്കം കാരൻ സി.കെ .നാരായണ പിള്ള .പക്ഷെ അദ്ദേഹത്തിന്റെ ഫോട്ടോ ലഭ്യമല്ല.എന്നാൽ പിൽക്കാലം പൂജപ്പുരയിൽ മഹിളാമന്ദിരം സ്ഥാപിച്ച ശ്രീമതി കെ.ചിന്നമ്മയുടെ ഫോട്ടോ വാഴൂർ ആശ്രമം ഒഴിവാക്കിയെങ്കിലും നെറ്റിൽ ലഭ്യമാണ് .അവരാണ് വാഴൂരിലുള്ള നായർ പെൺകുട്ടികളെ മാന്യമായി വസ്ത്രം ധരിക്കാൻ പഠിപ്പിച്ചത് (കവുങ്ങിൻ കൂമ്പാള കോണകം ഒഴിവാക്കിയതും മാറ് മറയ്ക്കാൻ പ്രേരിപ്പിച്ചതും . അവർ തുടങ്ങിയ ആംഗലേയ സ്‌കൂൾ പക്ഷെ നാട്ടുകാർ തീവച്ചു നശിപ്പിച്ചു . മ്ലേച്ച ഭാഷ പഠിപ്പി ക്കേണ്ട എന്ന കാരണം കാട്ടി .

വൈക്കം സി.കെ നാരായണ പിള്ള (1880-1936) പൊന്കുന്നത്ത് ആദ്യം എത്തിയതാകട്ടെ 1906 ല്-മാത്രവും .ചിറക്കടവ് സർക്കാർ സ്‌കൂൾ വക ഗേറ്റിൽ എഴുതിയിരിക്കുന്ന ബോർഡിലാകട്ടെ, സ്ഥാപക വര്ഷം 1881 . അന്ന് നാരായണപിള്ളയുടെ പ്രായം ഒരു വയസ് മാത്രം. അതെങ്ങനെ വന്നു ഈ 1881എന്നത് എന്നെ കുറേക്കാലമായി അലട്ടിയിരുന്ന ഒരു ചോദ്യം ആയിരുന്നു .

(Now a Medical Graduate from OXFORD)

വാഴൂർ തീർത്ഥ പാദസ്വാമികളുടെ ജീവചരിത്രം (രണ്ടുഭാഗം) എഴുതിയ വിദ്യാനന്ദ തീർഥ പാദസ്വാമികൾ, ചെറുവള്ളിക്കാരൻ പണ്ഡിറ്റ് രാമകൃഷ്ണ വൈദ്യൻ എന്നിവർ വൈക്കം സി.കെ. നാരായണ പിള്ളയുടെ ജീവചരിത്രം നമുക്ക് നൽകിയത് ഇക്കാര്യത്തിൽ ഒട്ടൊക്കെ സഹായിക്കുമെങ്കിലും സംശയം പിന്നെയും നിലനിന്നു .

അപ്പോഴാണ് ചിറക്കടവുകാരനായ പി.പി. നാരായണൻ നായർ (കുഞ്ഞുപിള്ള ആശാൻ ,76 വയസ്സൂള്ളപ്പോള്, 1973 ലെഴുതിയ “ശ്രീമദ് ദയാന്ദസ്വാമികൾ " എന്ന ജീവചരിത്രം ജനകീയ വായനശാലാ സ്ഥാപകൻ കവി മധു നൽകിയത്. റബർ മാസിക എഡിറ്റർ ആയിരുന്ന എം. ജെ .സതീഷ് ചന്ദ്രൻ നായരുടെ കൈവശമുണ്ടായിരുന്ന അദ്ദേഹത്തിന്റെ റബർ സീലുള്ള പുസ്തകത്തിന്റെ ഫോട്ടോ കോപ്പി കിട്ടിയപ്പോൾ ഏറെ സന്തോഷം തോന്നി. അതിൽ ആശാൻ ചിറക്കടവിലെ ആദ്യ സരസ്വതീക്ഷേത്രത്തിന്റെ പിറവി വിശദമായി വിവരിക്കുന്നു. അദ്ദേഹത്തിന്റെ ആദ്യ ഗുരുനാഥൻ ആയിരുന്ന പാലമറ്റത്തിൽ ആശാൻ ചിറക്കടവ് ക്ഷേത്ര ത്തിനു സമീപം ഒരു കുടിപ്പള്ളിക്കൂടം നടത്തി അറുപതിൽ പരം കുട്ടികളെ അവിടെ പഠിപ്പിച്ചു പോന്നു .അവിടെ ഉള്ള കുട്ടികളെ പരീക്ഷിച്ചു രണ്ടു ക്ളാസുകളിൽ ആയി തിരിച്ച് പ്രൈമറി സ്‌കൂൾ സ്ഥാപിച്ചത് വൈക്കം നാരായണ പിള്ള സാർ .

.കുഞ്ഞുപിള്ള ആശാനും അവിടെ പ്രവേശനം കിട്ടി. അദ്ദേഹം ജനിച്ചത് 1897 ല് .സ്‌കൂൾ പ്രവേശനം കിട്ടിയത് ഒന്പതാം വയസ്സിലോ അതു കഴിഞ്ഞോ ആകാം .ആശാന് പ്രായമോ വയസ്സോ നല്കുന്നില്ല.എങ്കിൽ സ്‌കൂൾ തുടങ്ങിയത് 1906 ലോ അതിനു ശേഷമോ ആവണം. വൈക്കം നാരായണ പിള്ള ചിറക്കടവിൽ എത്തിയ വര്ഷം തന്നെ സ്‌കൂൾ തുടങ്ങാന് സാദ്ധ്യത കുറവ്. അധികൃതര് കൂടുതൽ പഴക്കം കാട്ടാൻ കുടിപ്പള്ളിക്കൂടം തുടങ്ങിയ വര്ഷം സ്‌കൂൾ സ്ഥാപിതമായി എന്ന് കാണിക്കുന്നതാവണം . 1881ൽ ചിറക്കടവിൽ പ്രൈമറി സ്‌കൂൾ ഉണ്ടായിരുന്നില്ല എന്നതാണ് വാസ്തവം .ചുരുക്കത്തില് സ്കൂളിന്റെ പ്രായം 114 ലോ അതില് കുറവോ ആകണം.

ചെറുപ്പത്തിൽ കുടുംബ കലഹം മൂലം അക്ഷരാഭ്യാസം കിട്ടാതെ പോയ വൈക്കം സി.കെ നാരായണ പിള്ള, സ്വയം അക്ഷരം പഠിച്ചു തുടങ്ങുന്നത് പതിനേഴാം വയസ്സിൽ .അതിനു ശേഷം മുഖ്യ പരീക്ഷ എഴുതി പാസായി രണ്ടു കൊല്ലം ഹൈസ്‌കൂളിൽ പഠിച്ചശേഷം ഗ്രാമ പ്രദേശങ്ങളിൽ പ്രൈമറി സ്‌കൂളുകൾ സ്ഥാപിക്കാൻ ലക്ഷ്യ മിട്ടു 1906- ൽ ചിറക്കടവിൽ എത്തി.

അവിടെ കുടിപ്പള്ളിക്കൂടം മാത്രമേ ഉള്ളു എന്ന് നാരായണ പിള്ള മനസിലാക്കി .

പറവൂർ കൃഷ്ണപിള്ള , മാളിയേക്കൽ കൃഷ്ണപിള്ള പാലമറ്റത്തിലാശാൻ , മണലൂരാശാൻ , കല്ലാറയിൽ കൊച്ചുകുഞ്ഞുപിള്ള, മൂരിപ്പാറ നീലകണ്ഠപ്പിള്ള, മുളവേലിൽപത്മനാഭപിള്ള , മറ്റത്തിൽ പത്മനാഭപിള്ള കുടലുംപാറ പത്മനാഭപിള്ള എന്നിവരെ ചേർത്ത് അദ്ദേഹം ഒരു സംഘം ഉണ്ടാക്കുകയാണ് ആദ്യം ചെയ്തത് .

തുടർന്ന് വിവിധ പ്രഭാഷണങ്ങൾ സംഘടിപ്പിച്ചു ചിറക്കടവുകാരെ ബോധവൽക്കരിച്ചു .സ്‌കൂളിന്റെ ആവശ്യം നാട്ടുകാരെ ബോധ്യമാക്കി . തുടർന്ന് പാലമറ്റത്തിൽ ആശാന്റെ സ്‌കൂളിലെ 60 കുട്ടികൾക്ക് പരീക്ഷ നൽകി രണ്ടു ക്ളാസുകളിൽ അഡ്മിഷൻ നൽകി സ്‌കൂൾ തുടങ്ങി . വാക്യം ,വാക്യശേഷം ,പരൽപ്പേര്‌ നീതിസാരം ,മണിപ്രവാളം ഇരുപത്തിനാലു വൃത്തം അമരകോശംഎന്നിവ പാലമറ്റത്തിലാശാന് കുടിപ്പള്ളിക്കൂടത്തിൽ വച്ച് തന്നെ പഠിപ്പിച്ചിരുന്നു . കുടിപ്പള്ളിക്കൂടത്തിലും സർക്കാർ സ്‌കൂളുകളിലും ഫീസ് നൽകേണ്ട കാലത്ത് വൈക്കം നാരായണ പിള്ള കുട്ടികളെ സൗജന്യമായി പഠിപ്പിച്ചു പോന്നു .പുസ്തകം, ബുക്ക് ഇവയും സൗജന്യമായി നൽകി .

പറവൂർ കേശവപിള്ള പണിത കെട്ടിടം നിൽക്കുന്ന സ്ഥലത്തായിരുന്നു ആദ്യം സ്‌കൂൾ എന്ന് കുഞ്ഞുപിള്ള ആശാൻ ഓർമ്മിക്കുന്നു . ഇപ്പോൾ സ്‌കൂൾ ഇരിക്കുന്ന സ്ഥലത്ത് നാട്ടുകാർ കെട്ടി ഉണ്ടാക്കിയ ഷെഡിൽ മൂന്നാം ക്ലാസ് തുടങ്ങി .തുടർന്ന് ഗവ സ്‌കൂളിലെ സിലബസ് അനുസരിച്ചു ആറാംക്ലാസ്സുവരെ വിദ്യാലയത്തെ നാരായണ പിള്ള സാർ വളർത്തി വലുതാക്കി . അധ്യാപകരുടെ ചിലവും ശമ്പളവും സാർ തന്നെ നൽകി പോന്നു . അദ്ദേഹത്തിന്റെ സഹ അദ്ധ്യാപകർ പരമേശ്വരൻ പിള്ള, കൃഷ്ണപിള്ള, മാധവൻ പിള്ള, ഗോവിന്ദപ്പിള്ള , സംസ്കൃത അദ്ധ്യാപകൻ ബ്രഹ്മശ്രീ നീലകണ്ഠൻ ഇളയത് , സംഗീത അദ്ധ്യാപകൻ കരണീയം കേശപണിക്കർ , സി.എൻ കേശവപിള്ള , ഏറത്ത് മഠത്തിൽ കേശവപിള്ള, എന്നിവരുടെ പേര് കുഞ്ഞുപിള്ള ആശാൻ നല്കി'. എന്നാൽ അവരുടെ കൂടുതൽ വിവരങ്ങൾ , വീട്ടുപേര്, സ്ഥലം എന്നിവ ലഭ്യമല്ല . കൊട്ടാരക്കര സദാനന്ദസ്വാമികൾ, വാഴൂർ തീർത്ഥ പാദസ്വാമികൾ ജില്ലാജഡ്ജി ശങ്കരപ്പിള്ള, സാഹിത്യപഞ്ചാനന് പി.കെ നാരായണ പിള്ള ,എസ് കെ നായർ ,മഹിളാമന്ദിരം ചിന്നമ്മ, മുന്സിഫ്മാർ, വക്കീലന്മാർ എന്നിവരെ ക്ഷണിച്ചു വരുത്തി അദ്ദേഹം സ്കൂളിൽ പ്രഭാഷണങ്ങൾ നടത്തി പോന്നു സഹോദരസമാജം, പുരാണപാരായണ സംഘം , കാപ്പി സംഘം എന്നിവയും അദ്ദേഹം സംഘടിപ്പിച്ചു പോന്നു എന്നാൽ ചിറക്കടവ് കാർ അദ്ദേഹത്തെ നാട്ടിൽ നിന്നോടിച്ചു .1913 ൽ അദ്ദേഹം അടൂർക്കു പോയി .സന്യാസിയായി .ക്ഷയ രോഗിയായി .ആശ്രമവും സംസ്കൃത സ്‌കൂളും സ്ഥാപിച്ചു .പിൽക്കാലം അവ എൻ. എസ്. എസ് വകയായി മാറി .ചിറക്കടവ് ചെറുവള്ളി വാഴൂർ നിവാസികൾ അദ്ദേഹത്തെ മറന്നു .ഒപ്പം ശ്രീമതി ചിന്നമ്മയേയും

തമസ്കരിക്കപ്പെട്ട മോഡേൺ ഡോക്ടർ സമൂഹം

മലമ്പനി ,സന്നിപാത ജ്വരം ,പിള്ളവാതം വിഷൂചിക ,വരട്ടു ചൊറി,കുഷ്ഠം തുടങ്ങിയ പകർച്ച വ്യാധികളുടെ കൂത്തരങ്ങായിരുന്ന മലനാട്ടിൽ കഴിഞ്ഞിരുന്ന ജനതയെ ആരോഗ്യവാന്മാരാക്കുന്നതിലും ജനസംഖ്യാ വിസ്പോടനത്തെ തടഞ്ഞു നിർത്തുന്നതിലും മുഖ പങ്കു വഹിച്ചത് അലോപ്പതി വിദ്യാഭ്യാസം നേടിയ മോഡേൺ ഡോക്ടർമാരാണ് .

ആദ്യകാലങ്ങളിൽ മധ്യ തിരുവിതാംകൂറിലെ ക്രിസ്ത്യൻ സമുദായക്കാർ മാത്രമാണ് മോഡേൺ മെഡിസിൻ പഠനത്തിന് (അതും കേരളത്തിന് വെളിയിൽ ) പോയിരുന്നത് .

ഹിന്ദു സമുദായത്തിൽ നിന്നും ആദ്യമായി മോഡേൺ മെഡിസിൻ പഠനം നടത്തി ഡോക്ടർ ആയി, സർക്കാർ സർവീസിൽ പാമ്പാടി ,കാഞ്ഞിരപ്പള്ളി തുടങ്ങിയ സർക്കാർ ആതുരാലയങ്ങളിൽ സേവനം നടത്തി ചരിത്രം സൃഷ്ഠിച്ചത് “പൊൻകുന്നം ട്രസ്റ്റിന്റെ” സ്ഥാപക ചെയർമാൻ,( “പൊൻകുന്നം ചരിത്രത്തിലൂടെ” ,അവന്തി പബ്ലിക്കേഷൻസ്, കോട്ടയം 1993 പുറം 26 കാണുക) “ആധുനിക പൊന്കുന്നത്തിന്റെ ശില്പി” ആയിരുന്ന പുന്നാം പറമ്പിൽ മ .രാ .രാജശ്രീ അയ്യപ്പൻ പിള്ള നീലകണ്ഠപ്പിള്ളയുടെ, മൂന്നാമ ത്തെ മകൻ ബംഗ്ളാവിൽ പി.എൻ .കൃഷ്ണപിള്ള ആണ് . പിൽക്കാലത്ത് അദ്ദേഹത്തിന്റെ മക്കളായ കെ .ബാലകൃഷ്ണ പിള്ള(ബാലൻ ) , കെ .നീലകണ്ഠപ്പിള്ള (മണി )എന്നിവർ മണിപ്പാലിൽ നിന്നും എം. ബി. ബി. എസ് നേടി .ഡോക്ടർ ബാലൻ (കെ.ബി .പിള്ള ) യൂ.കെയിൽ നിന്നും സർജറിയിൽ FRCS നേടി സർജൻ ആയി പൊന്കുന്നത്ത് തന്നെ “ശാന്തി നികേതൻ” ഹോസ്പിറ്റൽ സ്ഥാപിച്ചു .അനുജൻ മണി (ഡോ .കെ എൻ പിള്ള ) ക്ഷയ രോഗ ചികിത്സകനായി കോഴിക്കോട് മെഡിക്കൽ കോളേജിൽ അധ്യാപകനായി . മൂന്നാമത്, നാലാമത് തലമുറകളിൽ പെട്ട നിരവധി മോഡേൺ ഡോക്ടർമാർ സ്പെഷ്യലിസ്റ്റുകൾ,സൂപ്പർ സ്പെഷ്യലിസ്റ്റുകൾ ഇപ്പോൾ വിദേശങ്ങളിലും നാട്ടിലും ആതുരസേവനം നടത്തുന്നു .

“ധർമ്മ പുത്രർ” എന്നറിയപ്പെട്ട പുന്നാം പറമ്പിൽ (ഒന്നാം ഭാഗം) ഭാസ്കരപിള്ളയുടെ മൂത്ത മകൻ ഡോ .വിശ്വനാഥപിള്ള (ബേബിച്ചൻ),ചിറക്കടവിൽ നിന്നും ആദ്യമായി തിരുവനന്തപുരം മെഡിക്കൽ കോളേജിൽ നിന്ന് ബിരുദം നേടിയ ശേഷം നേത്രരോഗ ചികിത്സകനായി ഏറെ വര്ഷം കാഞ്ഞിരപള്ളി താലൂക് ആശുപത്രിയിൽ സേവനം അനുഷ്‌ടിച്ചു . ശേഷം “താളിയാനിൽ” കവലയിൽനേത്ര ചികിത്സ നടത്തിയിരുന്നു .പിൽക്കാലം ഗവ ഹോസ്പിറ്റലിന് സമീപം ആധുനിക രീതിയിൽ നേത്ര ചികിത്സയും ഒപ്റ്റിക്കൽ സേവനവും നടത്തി വരുന്നു .കാഞ്ഞിരപ്പള്ളി സെന്റ് ജോസഫ്സ് ഐ ഹോസ്പിറ്റൽ സ്ഥാപക, ഡോ അന്നാമ്മ ,സർക്കാർ സർവീസിൽ തന്റെ സീനിയർ ആയിരുന്ന ഡോക്ടർ വിശ്വനാഥ പിള്ള നൽകിയ പ്രോത്സാഹനം എടുത്ത് പറയുന്നു അവരുടെ സ്മരണക്കുറിപ്പിൽ .ആയിരം പൂർണ്ണ ചന്ദ്രന്മാരെ ദർശിച്ച ആ നേത്ര രോഗ വിദഗ്ധനെ പഞ്ചായത്തിന് ഒന്നാദരിക്കാമായിരുന്നു.

പുന്നാംപറമ്പിൽ നീലകണ്ഠപ്പിള്ളയു ടെ രണ്ടാമത്തെ മകൻ, ആനുവേലിൽ നാരായണ പിള്ളയുടെ, മകൾ പി.എൻ ശാന്തകുമാരി കോട്ടയം മെഡിക്കൽ കോളേജിലെ ആദ്യ ബാച്ചിൽ പ്രവേശനം നേടി .പിൽക്കാലം നേത്ര ചികിൽ സകയായി വിവിധ സർക്കാർ ആതുരാലയങ്ങളിൽ സേവനം അനുഷ്ടിച്ചു .ഭർത്താവ് ഫിസിഷ്യൻ ആയ ഡോക്ടർ രാജശേഖരനും വിവിധ സർക്കാർ ആതുരാലയങ്ങളിൽ സേവനം അനുഷ്ടിച്ചു . ആ ദമ്പതി കളുടെ മൂന്ന് ആണ്മക്കളും കോട്ടയം മെഡിക്കൽ കോളേജിൽ നിന്ന് തന്നെ മെറിറ്റിൽ പ്രവേശനം നേടി വിവിധ സൂപ്പര് സ്പെഷ്യാലിറ്റി ഡോക്‌ടർ മാരായി വിദേശത്തും നാട്ടിലും ആതുര സേവനം നടത്തുന്നു . മൂന്നു ആണ്മക്കളും ഡോക്ടർ മാരെ വിവാഹം കഴിച്ചു .അങ്ങനെ ഒരു വീട്ടിലെ എട്ടു ഡോക്ടർ മാർ (“ഡോക്ടർ മാരുടെ എട്ടു കെട്ട് “ ഫോട്ടോ കാണുക ) സ്പെഷ്യലിസ്റ്- സൂപ്പർ സ്പെഷ്യലിസ്റ്റ് കളായി മധ്യ തിരുവിതാംകൂറിൽ ചരിത്രം സൃഷ്ടിച്ചത് ചിറക്കടവ് പഞ്ചായത്ത് അറിഞ്ഞതേ ഇല്ല .ഇപ്പോൾ ശാന്തി നികേതൻ ഹോസ്പിറ്റൽ എം ഡി ആയ കവി യത്രി കൂടി ആയ ഡോക്ടർ ശാന്തകുമാരിയ്ക്ക് പഞ്ചായത്തിന് ഒരാദരവ് കൊടുക്കാമായിരുന്നു . പക്ഷെ ചെയ്തു കണ്ടില്ല .ഇനിയും ചെയ്യാവുന്നതേ ഉള്ളു .

സർക്കാർ ആതുരാലയം ഇല്ലാത്ത പൊന്കുന്നത്ത് ആതുരസേവനം നിർവഹിക്കപ്പെട്ടിരുന്നത് ബന്ധുക്കളായ മൂന്നു വെള്ളാളകുലജാതരാൽ , അതിൽ രണ്ടു കൂട്ടർ ഡോക്ടര്മാർ തന്നെ ,ഏതാണ്ട് ഒരേ കാലത്ത് (1975 ) സ്ഥാപിക്കപ്പെട്ട മൂന്നു സ്വകാര്യ ഹോസ്പിറ്റലുകൾ വഴിയാണ് .

കെ.വി .എം, എസ്സിന് വേണ്ടി കമലാലയം പി.എൻ .പിള്ള , മരുമകൻ അഡ്വേ .പി ആർ രാജഗോപാൽ എന്നിവർ സ്ഥാപിച്ച കെ.വി .എം എസ്‌ ഹോസ്പിറ്റൽ ,ഭാരം ചുമന്നു ക്ഷീണിക്കുന്ന ചിറക്കടവിലെ പാവപ്പെട്ടവർക്ക് വേണ്ടി ,വീടിനു മുന്നിൽ “അത്താണി” പണിയിച്ചു ചരിത്രം സൃഷ്ടിച്ച ചാപ്പമറ്റം പരമേശ്വരൻ പിള്ള (ആധുനിക പൊന്കുന്നതിന്റെ ശില്പി പുന്നാം പറമ്പിൽ നീലകണ്ഠപ്പിള്ളയുടെ സഹോദരി പുത്രൻ ആയിരുന്നു ഇദ്ദേഹം )യുടെ മൂത്തമകൻ ഡോക്ടർ സി.പി. എസ് (ശങ്കര)പ്പിള്ള ) എന്ന ത്വക്‌രോഗ വിദഗ്ദൻ സ്ഥാപിച്ച “ശ്രീഹരി” ഹോസ്പിറ്റൽ , ബംഗ്ളാവിൽ ഡോക്ടർ കെ.ബി പിള്ള FRCS ,ആനുവേലിൽ നീലകണ്ഠപിള്ള എന്നിവർ ഡോ കെ.സി ചെറിയാൻ കോവൂരിന്റെ സഹകരണത്തോടെ സ്ഥാപിച്ച“ശാന്തി നികേതൻ” ഹോസ്പിറ്റൽ എന്നിവ ആണ് ആ മൂന്ന് ആതുരാലയങ്ങൾ .

അവരിൽ ഒരാളുടെ മൂന്നാം തലമുറയിൽ ഉള്ള യുവതി , കേരളത്തിൽ നിന്നും ,ഒരു പക്ഷെ ഇന്ത്യയിൽ നിന്ന് തന്നെയും, ആദ്യമായി ഓക്സ്ഫെഡ് മെഡിക്കൽ കോളേജിൽ മെറിറ്റിൽ അഡ്മിഷൻ വാങ്ങി ഡോക്ടർ ആയി കേംബ്രിഡ്ജിൽ പരിശീലനം നേടി വരുന്നു .

ചിറക്കടവിന്റെ തനതു സന്തതിയായ ,വെള്ളാള സമാജം പ്രൈമറി സ്‌കൂൾ ഉൽപ്പന്നമായ, ഡോ .ടി എം ഗോപിനാഥപിള്ള, കോട്ടയം മെഡിക്കൽ കോളേജിൽ നിന്നും ബിരുദവും ബിരുദാനന്തര ബിരുദവും നേടി എരുമേലി ,മുണ്ടക്കയം കാഞ്ഞിരപ്പള്ളി തുടങ്ങിയ സർക്കാർ ആതുരാലയങ്ങളിൽ സേവനം അനുഷ്ടിച്ചു .കാഞ്ഞിരപ്പള്ളി സർക്കാർ ആശുപത്രി സൂപ്രണ്ട് എന്ന നിലയിൽ നിരവധി പരിഷ്ക്കാരങ്ങൾ വരുത്തിയ അദ്ദേഹം ആരോഗ്യ ബോധ വൽക്കരണ രംഗത്ത് ,സ്വന്തം യൂട്യൂബ് ചാനൽ വഴി നിരന്തരം ശ്രദ്ധേയമായ സംഭാവന നൽകിവരുന്നു .കാഞ്ഞിരപ്പള്ളി ഐ .എം .എ യുടെ പ്രസിഡന്റ് കൂടിയായ അദ്ദേഹത്തിനെ കൂടി പഞ്ചായത്തിന് ആദരിക്കാമായിരുന്നു . സാരമില്ല . ഇനിയും സമയം ഉണ്ട് . അത്ഭുതകരമായ കാര്യം പഞ്ചായത്ത് കെട്ടിടത്തിന്റെ ചുറ്റുവട്ടത്ത് തന്നെ ജന്മഗൃഹങ്ങളും സ്ഥാപനങ്ങളും ഉള്ളവരത്രേ ഇവരെല്ലാം .എന്നിട്ടും ഭരണ രംഗത്തുള്ളവരുടെ കണ്ണിൽ അതൊന്നും പെട്ടില്ല

ആദ്യകാലങ്ങളിൽ ക്രിസ്ത്യൻ യുവതികൾ മാത്രണ് നേഴ്സിങ് പരിശീലന ത്തിനു പോയിരുന്നത്.ഹിന്ദുക്കളോ യുവാക്കന്മാരോ അതിനു പോയിരുന്നില്ല . കെ.വി എം എസ് ഹോസ്പിറ്റലിലെ നേഴ്സിങ് സൂപ്രണ്ട് ആയിരുന്ന ഈ .എൻ നീലകണ്ഠപ്പിള്ള സഹോദരിമാരോടൊപ്പം നേഴ്സിങ് പഠിച്ചു ചരിത്രം തിരുത്തി ക്കുറിച്ചു .മെഡിക്കൽ കോളേജ് നേഴ്സിങ് സൂപ്രണ്ട് പദവിയിൽ നിന്ന് റിട്ടയർ ചെയ്ത ശേഷം കുറേനാൾ അദ്ദേഹം കെ.വി .എം എസ് ഹോസ്പിറ്റലിലും സേവനം അനുഷ്ടിച്ചു ,

ഇന്ത്യൻ പ്രസിഡന്റിൽ നിന്നും ഫ്ലോറൻസ് നൈറ്ററിംഗേൽ അവാർഡ് നേടിയ ഒരു മഹിള കൂടിയുണ്ട് നമ്മുടെ മണ്ഡലത്തിൽ ;സോജാ(കാഞ്ഞിരപ്പള്ളി ഗവ ഹോസ്പിറ്റൽ ).

കുറുപ്പ് സാറിനേയും ഒഴിവാക്കി

ദൃശ്യം 2 K 25 എന്ന കെട്ടിലും മട്ടിലും ഉന്നതനിലവാരം പുലർത്തുന്ന,ഏറെ വർണ്ണ ഭംഗിയുള്ള , സോവനീറിന്റെ ഏക കുറവ് അതിലെ മൂന്നു പേജുള്ള ,എന്നാൽ നമ്പർ ഇല്ലാത്ത പിതൃശൂന്യ സചിത്ര ലേഖനമാണ് . ആരാൽ തട്ടിക്കൂട്ടി എന്ന് മനസിലാകുന്നില്ല .

തിരുകൊച്ചി എം. എൽ. ഏ (പീരുമേട് ,എതിരില്ലാതെ തെരഞ്ഞടുക്കപ്പെട്ട ഏക ഭാഗ്യവാൻ ) ഏ.കെ .പാച്ചുപിള്ള രണ്ടാമതായി പ്രത്യക്ഷപ്പെടുന്നു . പിന്നെ എം കെ ജോസഫും (1977 ) .എന്തിന് 1967,1969 ,1970 .1977 ,1991 ,1996 .2001 .എന്നിങ്ങനെ ഏഴുതവണ എം എൽ ഏ ആയ ,ഒരു തവണ സ്പീക്കറും മറ്റൊരു തവണ മന്ത്രിയും ആയ ചമ്പക്കര കെ.നാരായണ കുറുപ്പ് സാറിനെ മറന്നു കളഞ്ഞത് ശരിയായില്ല .പൊങ്കുന്നത്തെ ട്രാൻസ്‌പോർട് ബസ്സ്റ്റാൻഡ് ,വാഴൂരിലെ ഗവ പ്രസ്സ് എന്നിവ അദ്ദേഹത്തിന്റെ കാലത്ത് സ്ഥാപിക്കപ്പെട്ടവ യാ ണല്ലോ .

കോട്ടയം മെഡിക്കൽ കോളേജ് സ്ഥാപിച്ച വൈക്കം വേലപ്പൻ (1960 -62 ) ,കടയനിക്കാട്‌ പുരുഷൻ (1967 ,69) ,പൊന്കുന്നത്ത് ഡി ഈ ഓഫീസ് സ്ഥാപിച്ച കാനം രാജേന്ദ്രൻ (1982 ,87), കാഞ്ഞിരപ്പള്ളി മിനി സിവിൽസ്റ്റേഷൻ പണിയിച്ച അൽഫോൻസ് കണ്ണന്താനം ,പൊൻകുന്നത്ത് മിനിസിവിൽ സ്റ്റേഷൻ സ്ഥാപിച്ച ഡോ. എൻ :ജയരാജ് എന്നിവരെല്ലാം തഴയപ്പെട്ടു .

ഒരു കണക്കിന് നന്നായി അല്ലെങ്കിൽ അവരുടെയെല്ലാം പൈശാചിക ചിത്രങ്ങൾ വായനക്കാർക്കു കാണേണ്ടി വരുമായിരുന്നു . 1895 ൽ ചന്തയുടെ ഉദ്ഘാടകൻ ആയിരുന്ന ശ്രീ ടി .പപ്പുപിള്ള ആണ് സ്ഥലത്തിന് പേരിട്ടത് എന്ന് ലേഖനം .ഇക്കാര്യങ്ങൾ സ്ഥിരീകരിക്കാൻ കഴിഞ്ഞിട്ടില്ല എന്ന ലേഖനം രണ്ടാം പുറം .

“കൊല്ലം പിന്നായിരത്തിൽ പരമൊരെഴുപതാം അൽപ്പ ശ്രീ തിങ്കൾ തന്നിൽ കല്യശ്രീ ശുക്ര വാരെ ദിനമതു മധുനാ നാലതാം തീയതിക്ക് …….”. 1070 ( സി. ഇ. 1895 ) തുലാം നാലു വെള്ളിയാഴ്ച എന്ന് വെട്ടിയാങ്കൽ ആശാൻ എഴുതിയ കാര്യം സോവനീര്കാരന് അറിയില്ല ,

പുതിയ കാവ്യ ക്ഷേത്രത്തിലെ വിഗ്രഹം നഷ്ട പെടാതെ കാത്തു സൂക്ഷിച്ച മജിട്രേറ്റ് കം മുൻസിഫ് പെരുമ്പാവൂർ കാരൻ ഗോപാലപിള്ളയും .

“ചിറക്കടവ് ഗ്രാമപഞ്ചായത്ത് & സംസ്കൃതി” എന്ന പേരിൽ പ്രസിദ്ധീകരിക്കപ്പെട്ട അതി മനോഹരമായ സചിത്ര സോവനീറിൽ, ആർട്ട് പേപ്പറിൽ മൾട്ടി കളറിൽ “ഫോർ യൂ മീഡിയ” അതിമനോഹരമായി തയാറാക്കി അച്ചടിച്ച 96 പേജുകൾ ആണുള്ളത്ത് . പക്ഷെ പേജുനമ്പറുകൾ ഇടാത്ത വെറും മൂന്നു പേജുകളിലാണ് “ചിറക്കടവിന്റെ ചരിത്ര പശ്ചാത്തലം “ എന്ന ഏക സചിത്ര പിതൃശൂന്യ ലേഖനം . പടങ്ങളുടെ സ്ഥലം ഒഴിവാക്കിയാൽ വെറും രണ്ടേ രണ്ട് പേജ് .

പൊൻകുന്നം വർക്കി ,ഇ.കെ .പാച്ചുപിള്ള തുടങ്ങി വിദ്വാൻകരുണാകരൻ നായർ സാർ വരെയുള്ള 16 പേരുടെ ഫോട്ടോകൾ നല്കപ്പെട്ടിരിക്കുന്നു .ചിലർക്ക് അടിക്കുറിപ്പുകൾ ഉണ്ടെങ്കിലും അവ വായിക്കാൻ കഴിയുന്നില്ല .പി.ടി.ചാക്കോ ,കവിയൂർ പൊന്നമ്മ എന്നിവരുടെ ഫോട്ടോകൾ മാത്രമാണ് വ്യക്തമായി കാണാവുന്ന . മറ്റു ഫോട്ടോകൾ അവ്യക്തം .

സോവനീർ എഡിറ്റർ ഒരു അഭിഭാഷകൻ . പഞ്ചായത്ത് പ്രസിഡന്റും . പക്ഷെ പൊൻകുന്നം കോടതികളിൽ കേസുവാദിച്ചിരുന്ന പ്രമുഖരായ അഭിഭാഷകരിൽ ഒരാളെ പോലും സോവനീറിൽ സ്മരിച്ചിട്ടില്ല .

കാഞ്ഞിരപ്പള്ളി ടി. ബി. റോഡിനു പേര് നൽകിയ ദുമ്മിനി “വലിയവക്കീൽ” കരിപ്പാപ്പറമ്പിൽ ഡൊമനിക് തൊമ്മൻ (22 മക്കളുടെ പിതാവും മധ്യകേരളത്തിൽ റംബുട്ടാൻ ,ഫുലാസാൻ ,മാങ്കോസ്റ്റീൻ ,ദൂരിയാൻ എന്നീ നാല് മലേഷ്യൻ ഫലവൃക്ഷങ്ങൾ പ്രചരിപ്പിച്ച ,പിൽക്കാലം ഹോംഗ്രോൺ അതേറ്റെടുത്തു , പ്രകൃതി സ്‌നേഹി) ആണ് പ്രാതസ്മരണീയൻ . അദ്ദേഹത്തിന്റെ ഓഫീസ് പൊന്കുന്നത്ത് ശ്രീ .പി.എൻ .പിള്ള, മകൾ കമലമ്മയുടെ പേരിൽ സ്ഥാപിച്ച 24 മുറികൾ ഉള്ള മലനാട്ടിലെ ആദ്യ വ്യാപാര സമുച്ചയത്തിൽ (“കമലാ ബസാർ” )ആയിരുന്നു .ശ്രീമൂലം സഭാ മെമ്പർ കൂടിയായിരുന്നു അദ്ദേഹം . അദ്ദേഹത്തിന്റെ ജൂണിയർ ആയിരുന്നു പങ്ങപ്പാട്ട് വക്കീൽ എസ് .രാമനാഥപിള്ള .അദ്ദേഹവും ശ്രീമൂലം സഭയിൽ മെമ്പർ ആയിരുന്നു .SR എന്ന രണ്ടക്ഷരങ്ങളിൽ അറിയപ്പെട്ടിരുന്ന ആ അഭിഭാഷകനിൽ നിന്നാണ് പട്ടം താണു പിള്ളയുടെ പി.എസ് . പി മന്ത്രി സഭയിലെ ധന വന റവന്യു മന്ത്രി പി.എസ് നടരാജപിള്ളയ്ക്ക് (മാർച്ച് 10 സ്റ്റേറ്റ് കോൺഗ്രസ് സ്ഥാപക സെക്രട്ടറി ആയിരുന്ന അദ്ദേഹത്തിന്റെ ജന്മദിനം ആണ്) തിരുകൊച്ചി നിയമസഭയിൽ ഇന്ത്യയിൽ ആദ്യമായി ഭൂപരിഷ്കരണത്തിനു ആറു ബില്ലുകൾ അവതരിപ്പിക്കാൻ റവന്യു സംബന്ധമായ അറിവുകൾ കിട്ടിയത് ) .കലാസാഗർ എന്ന ചലച്ചിത്ര നിർമ്മാണ കമ്പനി സ്ഥാപിച്ച് 1953 ൽ “തിരമാല “ എന്ന ചലച്ചിത്രം നിർമ്മിച്ചതും അദ്ദേഹം .അദ്ദേഹത്തിന് പിന്നാലെ വന്ന മൂന്നു തലമുറകളും (കേരളസ്റ്റേറ്റ് ഫിലിം ഡവലപ്മെന്റ് കോർപ്പറേഷൻ ചെയർമാൻ പി.ആർ .എസ് പിള്ള ,മകൻ ഇന്റർനാഷണൽ ഫിലിം ഫെസ്റ്റിവൽ സംഘാടകൻ ,ആനിക്കാട്ടെ കെ. ആർ. നാരായണൻ നാഷണൽ ഇൻസ്റ്റിറ്റിയൂട്ട് ഓഫ് വിഷ്വൽ സയൻസസ് മേധാവി ആയിരുന്ന ശങ്കർ മോഹൻ .കൊച്ചുമകൻ മോഹൻ ശങ്കർ എന്നിവർ ചലച്ചിത്ര രംഗങ്ങളിൽ ഇന്ത്യൻ പ്രസിഡന്റിൽ നിന്നും അവാർഡുകൾ നേടി എന്നതും ശ്രദ്ധേയം ).

ഹോളിവുഡിൽ പോയി ചലച്ചിത്ര നിർമ്മാണത്തിൽ പരിശീലനം നേടി പിൽക്കാലം പൊൻകുന്നം വർക്കിയ്ക്കു വേണ്ടി “ചലനം “.മകം പിറന്ന മങ്ക “ എന്നിവ സംവിധാനം ചെയ്ത പുന്നാം പറമ്പിൽ ആനുവേലിൽ എൻ. ആർ (രാമകൃഷ്ണ ) പിള്ള എന്ന അതി സുന്ദരനും തമ്സ്കരിക്കപ്പെട്ടു .പഞ്ചായത്ത് ഓഫീസ് ഇരിക്കുന്ന “താളിയാനിൽ “ കവലയ്ക്കു ആ പേര് കിട്ടാൻ കാരണക്കാരനായ പുന്നാം പറമ്പിൽ താളിയാനിൽ പി.എൻ രാമകൃഷ്ണപിള്ള ,എന്ന പാൽ ചോദിച്ചാൽ കറവപ്പശുവിനെയും കിടാവിനെയും ദാനം ചെയ്തിരുന്ന “കർണ്ണൻ കൊച്ചശ”നെയും ചിറക്കടവ് പഞ്ചായത്ത്‌ തമശകാരിച്ചു കളഞ്ഞു . “മിസ്റ്റർ ചിറക്കടവ്” ആയിരുന്ന സ്വദേശി കരുണാകരൻ പിള്ളയും തമസ്കരിക്കപ്പെട്ടു .

പൊങ്കുന്നത്തെ അഭിഭാഷക ലോകം ഗുരു തുല്യനായി കരുതുന്ന ചിറക്കടവിന്റെ സ്വന്തം മുളവേലിൽ നീലകണ്ഠപ്പിള്ള എന്ന അഭിഭാഷക ശ്രേഷ്ഠഷ്ടനെയും വക്കീലന്മാർക്കു വേണ്ട ഓഫിസ് മുറികൾ പണിതു നൽകിയ പുന്നാംപറമ്പിൽ തൊട്ടിപ്പീടികയിൽ അഡ്വേ പി .എൻ .പരമേശ്വരൻപിള്ളയെയും തമസ്കരിച്ചു . അഡ്വേ .പി ആർ രാജഗോപാൽ (പി.എസ് .പി ) .അഡ്വേ .കാനം ശിവൻ പിള്ള (സി.പി ഐ ജില്ലാകമ്മറ്റി അംഗം ,വാഴൂർബ്ളോക് പഞ്ചായത്ത് വൈസ് പ്രസിഡന്റ് ഗീതാ പിള്ള യുടെ പിതാവ് ) എന്നിവരെയും പരാമർശിക്കാമായിരുന്നു .”തിരമാലയിൽ “ മുഖം കാണിച്ച (പോസ്റ്റർ കാണുക ) ഗോവിന്ദപ്പിള്ള വക്കീലിനെയും പഞ്ചായത്ത് തമശകാരിച്ചു .

കാഞ്ഞിരപ്പള്ളി മജിസ്‌ട്രേറ്റ് ,മുൻസിഫ് കോടതി എന്നിവ പാലായിലേക്ക് മാറിപ്പോകാതെ ,പൊന്കുന്നത്ത് തന്നെ പിടിച്ചു നിർത്താൻ, സ്‌കൂൾ സ്ഥാപിക്കാൻ നിർമ്മിക്കാൻ പണിയിച്ച കെട്ടിട സമുച്ചയം വിട്ടുനൽകിയ പുന്നാം പറമ്പിൽ മ(ഹാ) .രാ(ജാ) .രാജശ്രീ നീലകണ്ട പിള്ള (ചാവടിയിൽ അച്ഛൻ ) എന്ന അക്കാലത്തെ “ചിറക്കടവ് പട്ടെലറും” തമ്സ്കരിക്കപ്പെട്ടു ,

“രാജേന്ദ്ര” മൈതാനത്തിന് ആ പേരുനൽകിയ ചിറ്റടി ചന്ദശേഖരപിള്ള സാർ വാഴൂർ എൻ. എസ്. എസ്. കോളേജ് വൈസ് പ്രിസിപ്പൽ, മേജർ മുരാരി നായർ തുടങ്ങിയ അധ്യാപ ശ്രേഷ്ഠരും തമ്സ്കരിക്കപ്പെട്ടു .

പൊൻകുന്നം സീനിയർ സിറ്റിസൺ കളബ്ബ് സ്ഥാപിച്ച, മുതിർന്ന പൗരന്മാർക്ക് ഒത്തുകൂടാൻ സ്വന്തം കടമുറി വാടക കൂടാതെ വിട്ടു നൽകിയ പുന്നാംപറമ്പിൽ പനയ്ക്കൽ ചെല്ലപ്പൻ പിള്ളയും താമസ്കരിക്കപ്പെട്ടു. ചിറക്കടവ് ക്ഷേത്രത്തിൽ പിതാമഹന്റെ സ്മരണയ്ക്കായി നീലകണ്ഠൻ ആനയെ നടയ്ക്ക് ഇരുത്തിയത് അദ്ദേഹത്തിന്റെ നേതൃത്വത്തിൽ ആയിരുന്നു.

കുട്ടിക്കാലത്ത് ഏതാനും കാലം തങ്ങി എന്ന പേരിലാവണം കവിയൂർ പൊന്നമ്മ സ്മരിക്കപ്പെട്ടു . എന്നാൽ സ്വന്തം പേരിൽ മലനാട്ടിലെ ആദ്യ വ്യാപാരസമുച്ചയം (“കമലാ ബസാർ” ) ഉള്ള തൊണ്ണൂറ്റി അഞ്ചാം വയസ്സിൽ ഇപ്പോഴും ആരോഗ്യവതി ആയി കഴിയുന്ന കമലാലയത്തിലെ കമലമ്മ ചേച്ചി ഒരാദരവ് അർഹിച്ചിരുന്നു .പക്ഷെ ആരും ശ്രദ്ധിച്ചിരുന്നില്ല . മനോവൈകല്യം ഉള്ള കുട്ടികളെ കുറിച്ച് അമേരിക്കയിൽ പോയി ഗവേഷണം നടത്തി ഡോക്ടറേറ്റ് നേടി തിരുവനന്തപുരം പേരൂർക്കടയിൽ അത്തരം കുട്ടികൾക്ക് വേണ്ടി സ്ഥാപനം നടത്തുന്ന സഹോദരി മിസ്സസ് പി.ആർ. എസ് പിള്ളയും ചിറക്കടവിന്റെ അരുമ സന്തതി തന്നെ എന്ന കാര്യത്തെ പഞ്ചായത്ത് മറന്നു .ആ രണ്ടു മഹതികളെയും ജീവിച്ചിരിക്കുമ്പോൾ തന്നെ പഞ്ചായത്തിന് ആദരിക്കാമായിരുന്നു .

അവസാനമായി, ചിറക്കടവ് പഞ്ചായത്ത് ഒരിക്കലും മറക്കാൻ പാടില്ലാത്ത എന്നാൽ മറന്ന, കമലാലയം പി.എൻ പിള്ള (മുണ്ടുവേലിൽ കുട്ടൻ പിള്ള ) യെ കുറിച്ച് അല്പം .എൺപതു വര്ഷങ്ങൾക്ക് മുൻപ് മലനാട്ടിലെ “കമലാ ബസാർ” എന്ന ആദ്യ ഇരുനില വ്യാപാര സമുച്ചയം (മാൾ )കെട്ടിപ്പൊക്കിയ, ധനകാര്യ(ചിട്ടി ) സ്ഥാപനം സ്ഥാപിച്ച ,ദീർഘകാലം പഞ്ചായത്ത് മെമ്പർ ആയിരുന്ന , കമലാലയം എന്ന സ്വന്തം വീട്ടിൽ ഇരുന്നു വിളിച്ചാൽ വിളി കേൾക്കുന്ന,തിണ്ണയിൽ ഇരുന്നു നോക്കിയാൽ കാണുന്ന വൃന്ദാവനം എന്ന തന്റെ സ്വന്തം നിർമ്മിതിയുടെ(ഇളയ മകൾ സരസമ്മയുടെ വീട് ) എതിരെയുള്ള സ്ഥലത്ത് ചിറക്കടവ് പഞ്ചായത്ത് കെട്ടിടത്തിന് സ്ഥലം നൽകിയ ,അതിനു മുൻപിൽ സിമന്റു തറയിൽ തന്റെ കാലടികൾ പതിപ്പിച്ച ,പി,എൻ .പി റോഡ് നിർമ്മിക്കാൻ കാരണക്കാരനായ . നിരവധി പി.എൻ. പി കിണറുകൾ കുഴിപ്പിച്ച ,കേരളവെള്ളാള മഹാസഭാ (KVMS )സ്ഥാപകൻ ,കെ.വി .എം എസ് ഹോസ്പിറ്റൽ (പിൽക്കാലം പി.എൻ .പി മെമ്മോറിയൽ .ഇപ്പോൾ അരവിന്ദ ) സ്ഥാപകൻ പി.എൻ .പിള്ളയെയും 2025 ലെ ചിറക്കടവ് പഞ്ചായത്ത് സോവനീർ തമസ്‌കരിച്ചു കളഞ്ഞു .

അദ്ദേഹത്തിന്റെ മൂത്തമകൾ ശ്രീമതി ചെല്ലമ്മ (മറ്റത്തിൽ ) യുടെ കൊച്ചുമകൻ എഴുതിയ പ്രകാരം വാഴൂർ കുതിരവട്ടത്തിലെ വിദ്യാധിരാജാ എൻ. എസ്. എസ് കോളേജിന് വേണ്ടി ശ്രീ പി.എൻ .പിള്ള , 18 ഏക്കർ സ്ഥലം നൽകി എന്നാണ് .അതിന് തെളിവ് അദ്ദേഹത്തിന്റെ അമ്മൂമ്മയുടെ വാക്കുകൾ മാത്രം .നവതി ആഘോഷ ഭാഗമായി വാഴൂർ കുതിരവട്ടം എൻ. എസ്. എസ് ഹൈസ്‌കൂൾ ഹെഡ്മാസ്റ്റർ ചാമം പതാൽ മങ്ങാട്ട്, എം. കെ ഗോപാലകൃഷ്ണൻ നായർ (തങ്കപ്പൻ നായർ ), അച്ചടിച്ചു നൽകിയ നന്ദി പ്രകടനലേഖനത്തിൽ ശ്രീ .പി.എൻ .പിള്ള വാഴൂർ കോളേജിന് നാലേക്കർ നൽകിയതായി പറയുന്നു .എന്നാൽ പി.എൻ .പിള്ളയടെ മരണ ശേഷം അദ്ദേഹത്തിന്റെ ഒസ്യത്ത് പ്രകാശിപ്പിക്കാൻ മരുമകൻ അഡ്വേ .പി ആർ .രാജഗോപാൽ അച്ചടിച്ചു വിതരണം ചെയ്ത (“കൂപ്പു കൈ “) എന്ന നാലുപേജ് വരുന്ന ലേഖനത്തിൽ പി.എൻ .പിള്ള വാഴൂർ കോളേജിന് രണ്ടേക്കർ സ്ഥലം നൽകി എന്ന് എഴുതി വച്ചു .

ചരിത്ര വിമർശകൻ എന്ന നിലയിൽ മൂന്നു പേരെയും അവിശ്വസിക്കുന്നു.

ശ്രീ .പി.എൻ .പിള്ള സ്ഥലം ദാനം ചെയ്തു എന്നതിനുള്ള വ്യക്തമായ രേഖ ഒന്നും നിരവധി വര്ഷങ്ങള്ക്കു ശേഷവും എനിക്ക് കണ്ടെത്താനായില്ല . അദ്ദേഹം 1956 ൽ സ്ഥാപിച്ച, കെ വി എം എസ്സിനും(അതിന്റെ ആസ്ഥാനം ഇപ്പോൾ റാന്നിയിൽ “കൊട്ടാരം” കുടുംബം ദാനമായി നൽകിയ വസ്തുവിൽ ആണുള്ളത്) കെ.വി എം എസ് ഹോസ്പിറ്റലിനും (പുന്നാംപറമ്പിൽ “ബംഗ്ളാവിൽ” കുടുംബം വിലയ്ക്ക് നൽകിയ വസ്തുവിൽ ആണത് നിലകൊള്ളുന്നത് ) സ്വയാർജിത വസ്തുക്കളിൽ ഒരു സെന്റ് പോലും ദാനം ചെയാത്ത ശ്രീ പി.എൻ .പിള്ള, മന്നം പൊന്കുന്നത്ത് നേരിൽ വന്നു നിർബന്ധിച്ചിട്ടും എൻ. എസ്‌ . എസ്സിൽ ചേരാതെ മാറി നിന്ന് കെ.വി .എം എസ് സ്ഥാപിച്ച ശ്രീ പി.എൻ. പിള്ള, ദാനം ചെയ്യാൻ ഇടയില്ല എന്ന് കരുതേണ്ടി വരുന്നു ,മറിച്ചു തെളിവ് കിട്ടും വരെ . ബന്ധുക്കൾ സദയം ക്ഷമിക്കുക. അനുസ്മരിക്കപ്പെടേണ്ടിയിരുന്നു.